Elton John

Is amhránaí, pianódóir agus cumadóir Sasanach é Sir Elton Hercules John (a rugadh ar an 25 Márta, 1947), a bhfuil rath agus ómós domhanda bainte amach aige le níos mó ná 450 milliúin ceirnín díolta aige. Tá 30 albam seolta aige lena chomhoibrí cumadóireachta - an liriceoir Bernie Taupin - ón bhliain 1967 i leith.

Saolaíodh Elton John i bPinner, baile beag den lucht oibre in iarthuaisceart na príomhchathrach. Bhí dúil mhór aige sa cheol ón chliabhán agus d'fhoglaim sé a cheird ar phianó an tí. Agus an bhliain 1962 ann, chuaigh sé isteach ina chéad banna - grúpa rithim agus na gormacha darbh ainm Bluesology. Sa bhliain 1967, bhuail lena dhlúthchara agus comhchumadóir fad téarmach Bernie Taupin tar éis mír sa nuachtán ag lorg cumadóiri. Réitigh an bheirt lena chéile ón tús agus chaitheadar dhá bhliain ag cumadh amhrán d'amhránaithe amhail Lulu. Le linn na tréimhse céanna, bhí se thar a bheith gníomhach mar phianódóir ar ceirníní móra na seascaidí (The Hollies agus araile).

Scaoil John a chéad albam mar cheoltóir aonair (Empty Sky) sa bhliain 1969, agus b'é an rian "Your Song" óna dara halbam (Elton John) a shroich barr na gcairteacha sa bhliain ina dhiaidh. Chuaigh John i gcion ar ghlúin éagsúla nua sna 1990idí mar thoradh ar fhuaimrian an cartúin de chuid Disney The Lion King agus na ceoldrámaí Aida agus Billy Elliot the Musical. Tá iliomad duaiseanna buaite aige thar na blianta - Grammy, Tony agus Disney Legend.

Fear aerach pósta atá ann. Phós sé David Furnish sa bhliain 2005 agus tá beirt chlainne uchtaithe acu. Taobh amuigh den cheol, is fear mór peile é le fada an lae, agus na blianta caite aige ina chathaoirleach ar a chumann áitiúil Watford FC. Bronnadh uachtarántacht oinigh air sa bhliain 2005. Curtha ar fáil ag Wikipedia